सदा भोगी जो उन्मनी

                🌹श्रीमहाराज म्हणजे साक्षात परब्रह्म🌹



विठ्ठल:-  श्री महाराजांच्या घराण्यात विठ्ठलाची उपासना ही पूर्वीपासून चालत आली आहे. श्री महाराज यांचे आजोबा स्वतः विठ्ठलभक्त होते. जसजसे लिंगोपंतांचे वय वाढत चालले तसे त्यांना पंढरपुरला जाणे अशक्य होऊ लागले तेव्हा विठ्ठलाने त्यांच्या स्वप्नात येऊन सांगितले की आता तुला त्रास घेऊन हा देह कष्टवून पंढरपुरला येण्याची गरज नाही, मीच तुझ्या घरी येतो. त्याचे दोन अर्थ होते. एक म्हणजे त्यांच्या गोठयातील जमीनीखाली विठ्ठलाची मूर्ति सापड़णे आणि दूसरे म्हणजे श्रीमहाराज यांचा जन्म. आपले महाराज हे साक्षात विठ्ठल च होते. कारण महाराज तान्हे असताना घरात खेळायचे आणि पूजेतील पांडुरंगालाच उचलून आपल्या बरोबर खेळावयास आणायचे. तसेच पांडुरंगाचा नैवेद्यही स्वतःच खाऊन टाकायचे. आपले महाराज हे त्या विठ्ठलाप्रमाणे सदोदित विटेवर उभे राहून सदैव आपल्या भक्तांसाठी तत्पर असतात.


दत्तउपासना:- श्रीमहाराजांच्या घरात विठ्ठलाप्रमाणेच दत्तउपासना ही सुद्धा पूर्वीपासून चालत आली आहे. दत्तात्रय म्हणजेच ब्रह्मा, विष्णु आणि महेश यांचे एकत्रित रूप. श्रीमहाराज सुद्धा दत्तगुरुंप्रमाणे सदैव या सृष्टीचे संतुलन करतात.


गणपति:- श्रीमहाराज यांचे नाव गणपति. प्रेमाने सर्वजण त्यांना गणु असे म्हणत. गणपति म्हणजे गणांचा अधिपति, तसेच १४ विद्या आणि ६४ कलांचा सुद्धा अधिपति. महाराज सुद्धा सर्व कलांत निपुण होते आणि सर्व प्रकारच्या विद्या जाणून होते. गणपति म्हणजेच विघ्नहर्ता आणि विघ्नहर्त्याला काहीच अशक्य नसते. तसेच श्री महाराज यांना सुद्धा कधीही काहीच अशक्य नव्हते. पण एका रामनामा पलीकडे त्यांनी कोणाला काहीच सांगितले नाही.


श्रीकृष्ण:- श्रीमहाराजांच्या समाधि मंदिराच्या वरती श्रीकृष्णाची मूर्ती आहे. येणा-या घोर कलियुगात आपण श्रीकृष्णाप्रमाणेच वागले पाहिजे अशी शिकवण श्रीमहाराज देतात. महाराज म्हणायचे की आपण व्यवहारात स्वतः कधी लबाड़ी करू नये पण समोरील व्यक्तीने केलेली लबाड़ी ओळखण्याइतके चतुर व लबाड़ आपण असावे. तसेच प्रपंचात राहून परमार्थ करणारे श्रीमहाराज हे श्रीकृष्णाप्रमाणेच कर्मयोगाचे उत्तम उदाहरण आहेत. कधीकधी महाराज हे नटखट बाळकृष्णाप्रमाणे आपल्या लीला सर्वांना दाखवीत व कधीकधी योगेश्वर कृष्णाप्रमाणे ध्यानमग्न होऊन अखंड रामनामाचे चिंतन करणारे महाराज हे भक्ति, ज्ञान आणि अष्टांगयोगाचे उत्तम उदाहरण प्रस्तुत करतात.


मारुतिराय:-  श्रीमहाराज हे साक्षात मारुतिराय होते याचा प्रत्यय आणि प्रचिती वेळोवेळी त्यांच्या भक्तांनी अनुभवली आहे. मारुतिराया प्रमाणे अखंड रामाची भक्ति करणा-या महाराजांनी आयुष्यभर रामनामाचा सेतु बांधला. इतकेच नव्हे तर नाम घेण्याची इच्छा अपुरी राहिली म्हणून पुन्हा वाणीरूपाने अवतार घेऊन त्यांनी पूज्य श्री तात्यासाहेब केतकर यांच्या मुख़ातून नाम घेतले. आपले महाराज हे साक्षात मारूतिराय यांचेच अवतार आहेत.


महादेव:- आपले महाराज हे भगवान शंकर यांचे अकरावे रुद्रांश अंजनीपुत्र, पवनसुत, मारूतिराय यांचे अवतार होते. ते सुद्धा आयुष्यभर महादेवांप्रमाणेच प्रपंचाप्रति कायम अनासक्त व विरागी होते. महादेवांप्रमाणेच आपले महाराज सुद्धा सृष्टीतील कुठल्याही नियमापासून कधीच बाधित नव्हते. पण त्यांनी कधीही कुठल्याही नियमाचे उल्लंघन ही केले नाही. ओंकारातला जो ऊँ असतो साक्षात ते आपले श्रीमहाराज च आहेत.


श्रीराम:- श्रीराम हे श्रीमहाराज यांचे उपास्य दैवत आहे. आपले महाराज हे साक्षात निर्गुण ब्रह्म सनातन अव्यय अविनाशी अनादि प्रभु श्रीरामचंद्र च आहेत. श्रीमहाराज व श्रीराम एकच आहेत, वेगळे नाहीत. श्रीमहाराज हे साक्षात परब्रह्मच आहेत. ते या ब्रह्मांडाचे एकमेव नायक आहेत. ते आपल्या भक्तांना भवसागरातून तारुन नेण्यासाठी तसेच जन्म मृत्युच्या ८४ लक्ष योनींच्या या  फे-यातून आपली सुटका करण्यासाठी म्हणजेच आपल्या भक्ताला मोक्ष मिळवून देण्यासाठी सदैव तत्पर आहेत.

🌹।श्री राम जय राम जय जय राम।🌹



धन्यवाद



आनंद लेले