ठक्कर यांचा खमंग समोसा

सकाळी 8.15 ची वेळ, दिवस रविवारचा, लोक गर्दीत तिष्ठत उभेत, त्या दुकानात इतर अनेक पदार्थ सुद्धा आहेत जसे की खमण, कचोरी, वडा, बाकरवड़ी, फरसाण पण लोक ज्या कारणासाठी उभे आहेत तो अजून काही येताना दिसत नाहीये आणि अचानक दुकानाच्या दुस-या बाजूने छोटी हातगाडी येते आणि त्याचा खमंग वास सर्वत्र पसरतो आणि एकाएकी सर्व गर्दी बाजूला होते. कल्याण च्या टिळक चौक येथील प्रसिद्ध ठक्कर फरसाण मार्ट यांचा स्पेशल समोसा जगात भारी😍

आता समोसा तर आपण सगळीकड़ेच खातों, इतर सर्वत्र मिळणा-या समोशांप्रमाणेच हा सुद्धा अतिशय कुरकुरीत आणि खमंग पण याची खासियत अशी याच्यासोबत मिळणा-या लाल चटणी साठी हा समोसा अतिशय प्रसिद्ध आहे. आता तुम्ही म्हणाल की लाल चटणी, ती तर बहुधा सगळीकड़ेच मिळते.. पण इथे मिळणा-या लाल चटणीच वैशिष्टय अस की ती ढोकळ्याचा चुरा, गरम पाणी, हळद, साखर आणि तिखट अशा सर्व गोष्टी एकत्र करून बनवली जाते आणि तिची चव ही अप्रतिम असते त्याच कारणामुळे हा समोसा कल्याणात खूप जास्त प्रसिद्ध आहे. या समोश्याची अजून एक खासियत अशी की हा समोसा आठवडयाच्या कुठल्याही वारी खाता येतो. हा म्हणजे ज्यांना कांदा, लसूण इ. तत्सम प्रकारांच वावड़ आहे उदा. आज सोमवार आहे आणि शंकराला कांदा चालत नाही म्हणून मी कांदा किंवा लसूण खात नाही अस म्हणणारे कांदा या पदार्थाला तमोगुण उत्पन्न करणारा एकमेव भागीदार मानत असणारे लोक सुध्दा हा समोसा कधीही खाऊ शकतात कारण हा समोसा बनवताना कांदा, लसणीचा यत्किंचितही वापर होत नाही. साधारण सकाळी 8.30 ते सुमारे 11 या वेळेत हा समोसा मिळतो. ठक्कर फरसाण मार्टचे मालक मितुल भाई ठक्कर हे अतिशय हसतमुख आणि विनोदी अस व्यक्तिमत्व आहे ते सकाळी साधारण 8 च्या सुमारास दुकान उघड़तात, एकीकडे मोबाईल चार्जिंग ला लावलेला असतो आणि मोबाईल वर शास्त्रीय संगीतातली जुनी छान गाणी लावलेली असतात. चहावाला आला की त्यावेळेस जो कोणी समोर असेल त्याला "ले भाई थोड़ा चाय घे" अस नक्की विचारतात. दुकानात कितीही गर्दी असली तरी आपण शांतपणे आणि संयमाने उभे राहिलो तर स्वतःहून आपला नंबर आल्यावर विचारतात, पण गर्दीत उगाच आपण घाई गड़बड़ केली की म्हणतात "भाई रुक ना जरा".. प्लास्टिक ची पिशवी न वापरण्याच आणि देण्याच वचन ते अगदी काटेकोरपणे पाळतात त्यामुळे त्यांचे नेहमीचे ग्राहक यांच्या हातात कायमच कापड़ी पिशवी असतेच. ब-याच जणांना मितुल भाई यांचा हा स्वभाव अगाऊ, उद्धट वाटू शकतो. पण मला त्यांचा हा स्वभाव अगदी तंतोतंत पटतो. कारण कितीही ओळखीचा किंवा त्यांचा आप्तेष्ट आला तरी ते त्यांच्या नियमात आणि तत्वात मुळीच तड़जोड किंवा बदल करत नाहीत..

1976 साली मितुल ठक्कर यांचे वडील रमणीकलाल ठक्कर यांनी टिळक चौक इथे आपले दुकान सुरु केले.  सुरुवातीला फ़क्त फरसाणापुरतेच मर्यादित असलेल्या दुकानात त्यांनी समोसा, खमण, कचोरी अशा अनेक गोष्टी विकण्यास सुरुवात केली. 1990 पासून ठक्कर यांच्या व्यवसायात त्यांचे सुपुत्र मितुल ठक्कर यांनी हातभार लावण्यास सुरुवात केली आणि आज ते हा व्यवसाय अगदी व्यवस्थित रीतीने सांभाळत आहेत. अगदी सुरुवातीला 50 पैशात मिळणारा समोसा इतकी वर्ष लोटली तरी आजच्या या महागाईच्या जमान्यात सुद्धा फ़क्त 10 रुपयास मिळतो आणि ते सुद्धा या जगात भारी खमंग अशा चटणी सोबत😋 कल्याण मध्ये तसेच कल्याणच्या बाहेर सुध्दा या समोस्याची महती ही सर्वत्र पसरली असेलच पण कदाचित ज्यांना अजूनही या समोशाबद्दल माहित नसेल त्यांनी अवश्य एकदा कल्याणात येऊन ठक्कर यांचा समोसा अवश्य खाऊन बघा🙂🙂

धन्यवाद!

©आनंद लेले